ದ ಸ್ಮಿತ್‌ಸೋನಿಯನ್ ಇನ್‌ಸ್ಟಿಟ್ಯೂಷನ್, ವಾಷಿಂಗ್ಟನ್:

ಮಾನ್ಯರೇ,
ಯಂತ್ರ ಮತ್ತು ಮಾನವ ಹಾರಾಟ ಸಮಸ್ಯೆಯ ಬಗ್ಗೆ ಚಿಕ್ಕಂದಿನಿಂದಲೂ ನನಗೆ ಅಪಾರ ಆಸಕ್ತಿ. ಕೇಲಿ ಮತ್ತು ಪೀನಾಡ್ ಅವರ ಯಂತ್ರ ಮಾದರಿಯಲ್ಲಿ ಹಲವು ಗಾತ್ರದ, ಗಾಳಿಯಲ್ಲಿ ಹಾರಾಟ ನಡೆಸಬಲ್ಲಂತಹ ವಿವಿಧ ಹಾರುವ ಯಂತ್ರಗಳ ಮಾದರಿಗಳನ್ನು ನಾನು ಬಾಲ್ಯದಲ್ಲಿ ತಯಾರಿಸುತ್ತಿದ್ದೆ. ಅಂದಿನಿಂದ ಇಂದಿನವರೆಗಿನ ನನ್ನ ಅನುಭವಗಳು ಮತ್ತು ಅವಲೋಕನಗಳು ನನಗೆ ಒಂದು ವಿಷಯವನ್ನು ಸ್ಪಷ್ಟವಾಗಿ ಹೇಳಿವೆ- ಮಾನವ ಹಾರಾಟ ಸಾಧ್ಯ! ಅದ್ಭುತ ಚಮತ್ಕಾರಗಳನ್ನು ಸಾಧಿಸಲು ಬೇಕಾದ ಜ್ಞಾನ ಮತ್ತು ನೈಪುಣ್ಯ ಇಲ್ಲೂ ಇರಬೇಕು ಅಷ್ಟೇ.
ಪಕ್ಷಿಗಳು ಭೂಮಿಯಲ್ಲಿರುವಂಥ ಎಲ್ಲಾ ಜೀವಿಗಳಿಗಿಂತಲೂ ಉತ್ತಮ ಮತ್ತು ಸಮರ್ಥ ವ್ಯಾಯಾಮಪಟುಗಳು. ಕಾರ್ಯಕ್ಕೆ ತಕ್ಕ ಕಾಯ ಅವುಗಳದು. ಇದೇ ಕಾರಣಕ್ಕೆ ನಾವು ಮಾನವರು ಅವುಗಳ ಸಮಕ್ಕೆ ಬರಲಾರೆವು. ಪಕ್ಷಿಯೊಂದು ಹುಳವನ್ನೋ ಅಥವಾ ಇನ್ನೊಂದು ಪಕ್ಷಿಯನ್ನೋ ಬೇಟೆಯಾಡುವಾಗ ಅದರ ಸಾಮರ್ಥ್ಯ ಸಾಮಾನ್ಯ ಹಾರಾಟಕ್ಕಿಂತ ಮೂರು ಅಥವಾ ನಾಲ್ಕು ಪಟ್ಟು ಹೆಚ್ಚಿದೆ ಎಂಬ ಬಗ್ಗೆ ಯಾರೂ ಅನುಮಾನ ತಾಳಲಾರರು. ಒಂದು ಸರಳ ಹಾರಾಟ ನಡೆಸುವ ಸಾಮರ್ಥ್ಯ ಖಂಡಿತಾ ಮಾನವನಲ್ಲಿದೆ ಎಂಬುದನ್ನು ನಾನು ಬಲವಾಗಿ ನಂಬುತ್ತೇನೆ. ಮಾಹಿತಿ ಸಂಗ್ರಹ, ವಿಷಯ ಜ್ಞಾನ, ನಿಪುಣತೆ ಇವೆಲ್ಲವನ್ನೂ ಕಲೆ ಹಾಕಲು ಹಲವಾರು ಜನರ ಸಂಶೋಧನೆ- ಪ್ರಯೋಗಗಳು ಅತೀ ಅವಶ್ಯಕ. ಇವೆಲ್ಲವೂ ಒಟ್ಟುಗೂಡಿದರೆ ಮಾನವ ಹಾರಾಟದ ಕನಸು ನನಸಾಗಬಹುದು. ಆಪಲ್‌ಟನ್ ಮತ್ತು ಇತರ ಹಲವು ಪತ್ರಿಕೆಗಳು ಪ್ರಕಟಿಸಿದ ಮೇರಿ ಹಾಗೂ ಜೇಮಿಸನ್ ಅವರ ಬರಹಗಳು ಮತ್ತು ಇತರ ವ್ಯಾಪಕ ಮಾಹಿತಿಗಳಿರುವ ಲೇಖನಗಳಿಂದ ನಾನು ನನ್ನ ಅಧ್ಯಯನಗಳ ಬಗೆಗಿನ ವಿಷಯವನ್ನು ಕಲೆಹಾಕಿದೆ. ಪ್ರಾಯೋಗಿಕವಾಗಿ ಇವುಗಳನ್ನು ಕಾರ್ಯಗತಗೊಳಿಸುವಂಥ ವ್ಯವಸ್ಥಿತ ಅಧ್ಯಯನ ಮಾಡಬೇಕಾಗಿದೆ. ಇದಕ್ಕೋಸ್ಕರ ನಾನು ಸಾಮಾನ್ಯವಾಗಿ ನನ್ನ ನಿತ್ಯ ಕಾರ್ಯಗಳಿಂದ ಮೀಸಲಿಡುತ್ತಿದ್ದ ಸಮಯವನ್ನು ವ್ಯಯಮಾಡಲು ಸಿದ್ಧ. ಈ ವಿಷಯದ ಬಗ್ಗೆ 'ದ ಸ್ಮಿತ್‌ಸೋನಿಯನ್ ಇನ್‌ಸ್ಟಿಟ್ಯೂಷನ್' ಪ್ರಕಟಿಸಿರುವ ಲೇಖನಗಳು ಮತ್ತು ಸಾಧ್ಯವಾದರೆ ಇತರೆಡೆಗಳಿಂದ ಲಭಿಸಿರುವ ಮಾಹಿತಿಗಳನ್ನೂ ಆಂಗ್ಲ ಮುದ್ರಣದಲ್ಲಿ ನನಗೆ ಕಳುಹಿಸಿಕೊಡಬೇಕಾಗಿ ಕೇಳಿಕೊಳ್ಳುತ್ತೇನೆ. ಆಸಕ್ತಿಯಿದ್ದರೂ ಈ ವಿಷಯದಲ್ಲಿ ನಾನು ಪರಿಪಕ್ವನಲ್ಲ. ಪರಿಪೂರ್ಣವಾದ ಹಾರುವ ಯಂತ್ರವೊಂದರ ತಯಾರಿಗೆ ನನ್ನಲ್ಲಿ ಕೆಲ ಸಿದ್ಧಾಂತಗಳಿವೆ. ಪ್ರಸ್ತುತ ಈ ವಿಷಯದ ಬಗ್ಗೆ ಈಗಾಗಲೇ ಇರುವ ಎಲ್ಲಾ ಜ್ಞಾನಗಳನ್ನೂ ನಾನು ಪಡೆಯಬಯಸುತ್ತೇನೆ. ಆ ಮೂಲಕ ಅಂತಿಮ ಯಶಸ್ಸಿಗೆ ಕಾರಣರಾಗುವ ಭವಿಷ್ಯದ ಕಾರ್ಯಪಡೆಗೆ ನೆರವಾಗುವ ಇಚ್ಛೆ ನನ್ನದು. ಯಾವೆಲ್ಲಾ ನಿರ್ಬಂಧಗಳ ಮೇಲೆ ತಾವು ಮಾಹಿತಿಗಳನ್ನು ನನಗೆ ಕಳುಹಿಸುವಿರೋ ಗೊತ್ತಿಲ್ಲ. ಆದರೆ ಅವುಗಳ ಬೆಲೆಯನ್ನು ತಿಳಿಸಿದರೆ ನಾನು ಪಾವತಿಸುತ್ತೇನೆ.

ನಿಮ್ಮ ವಿಶ್ವಾಸಿ,
ವಿಲ್ಬರ್ ರೈಟ್
ರೈಟ್ ಸೈಕಲ್ ಕಂಪನಿ
1127, ಪಶ್ಚಿಮ ಮೂರನೇ ರಸ್ತೆ,
ಡೇಟನ್, ಒಹಿಯೋ.
ಮೇ 30, 1899